Hadisənin təfərrüatları açıqlanıb
Ermənistanda rus hərbçisi tərəfindən güllələnən bir ailənin altı üzvünün və qətldə şübhəli bilinən şəxsin adları bəlli olub.
APA-nın Ermənistan mətbuatına istinadən xəbərinə görə, bu barədə Ermənistan İstintaq Komitəsi rəhbərinin müşaviri Sona Truzyan açıqlama verib.
Onun sözlərinə görə, hadisə yerindən Gümrüdə dislokasiya olunmuş 102 saylı Rusiya hərbi bazasının qulluqçusu Valeri Permyakova aid çəkmələr tapılıb.
Qətlə yetirilənlərə gəlincə, bunlar ailə başçısı Seryoja Avetisyan, onun həyat yoldaşı Asmik, qızı Aida, oğlu Armen, onun həyat yoldaşı Araks və sonuncuların 1 yaş 8 aylıq övladı Asmik Avetisyanlardır. Sağ qalan altı aylıq Seryoja Armenoviç Avetisyan kəsilmiş-deşilmiş yaralarla xəstəxanaya yerləşdirilib. Əməliyyat olunan körpənin vəziyyəti ağır qiymətləndirilir.
Mərhumların qonşusu bildirib ki, səhər saat 6:20-də partlayış və ya atəş səsi eşidib. Onların meyitlərini isə ev sahibəsinin bacısı aşkarlayıb.
Hadisə yerinə Rusiya hərbi bazasının komandiri Andrey Ruzinski gəlib.
*****
15:07
Ermənistanda bir ailənin altı üzvünü güllələyən şəxsin hərbçi olduğu məlum olub.
APA-nın “Armtoday”ə istinadən xəbərinə görə, bu barədə Ermənistan İstintaq Komitəsi rəhbərinin müşaviri Sonna Truzyan açıqlama verib.
Onun sözlərinə görə, Myasnikyan küçəsindəki evlərin birində qatil bir ailənin altı üzvünü güllələyib, altı aylıq körpə isə ağır vəziyyətdə xəstəxanaya yerləşdirilib: “Bizə hərbi qulluqçunun hərbi hissədən qaçması barədə məlumat daxil olub. Hadisə yerindən tapılan əsgər çəkmələri üzərində onun adı və soyadı yazılıb”.
Gümrüdəki Avstriya xəstəxanasının baş həkimi direktoru Aşot Kurqinyan bildirib ki, körpənin bədənində kəsilmiş-deşilmiş yaralar var. Uşaq anasının meyitinin yanında olub. Ehtimal ki, qatil onun da öldüyünü güman edib.
Hazırda silahlı cinayətkarın axtarışları davam etdirilir. Qətldə Rusiyanın Ermənistandakı 102 saylı hərbi bazasının hərbi qulluqçusu şübhəli bilinir.
***
13:47
Ermənistanda bir ailənin 6 üzvü güllələnib.
APA-nln “news.am”a istinadən verdiyi məlumata görə, hadisə Gümrü şəhərində baş verib.
Həmin şəxslər odlu silahdan qətlə yetirilib. Onların arasında azyaşlı uşağın olduğu bildirilir.
|