Главная » 2014 » noyabr » 3 » Azərbaycan yolları qana boyandı: 8 ölü, 10 yaralı
14:03
Azərbaycan yolları qana boyandı: 8 ölü, 10 yaralı
Bakıdakı qəzalarda 4 nəfər ölüb
Noyabrın ilk günü Azərbaycan yollarında baş vermiş avtomobil qəzaları 8 nəfərin həyatına son qoyub. Baş Dövlət Yol Polisi İdarəsindən Lent.az-a verilən məlumata görə, noyabrın 1-də ümumilikdə 15 yol-nəqliyyat hadisəsi qeydə alınıb. Nəticədə dünyasını dəyişən 8 nəfərdən başqa 10 nəfər müxtəlif dərəcəli bədən xəsarətləri alıb.
Ölümlə nəticələnən qəzalardan 3-ü paytaxtda baş verib. Nizami rayonu ərazisində sərnişin avtobusu 2 nəfəri vurub öldürüb. Digər iki qəza isə Suraxanıda baş verib. Yeni Suraxanıda "Ford" və "Renault"un toqquşması nəticəsində 1 nəfər dünyasını dəyişib. Yeni Günəşlidə isə "VAZ 2107"nin vurduğu piyadanın həyatını xilas etmək mümkün olmayıb.
Ölümlə nəticələnən digər qəzalar Göygöl, Ağstafa, Şəmkir və Gəncənin Nizami rayonunda olub.
Hər bir faktla bağlı zəruri araşdırmalar aparılır.
