Faktı Azərbaycanın İstanbuldakı baş konsulu da təsdiqləyir “İslam Dövləti” qruplaşmasına qoşulmaq üçün Suriyaya keçməyə cəhd etdikləri iddia olunan 4 Azərbaycan vətəndaşı Türkiyənin Kilis bölgəsində saxlanılıb. APA-nın xəbərinə görə, Kilis polisi ümumilikdə 22 nəfərdən ibarət olan qrupun rayonun Suriya ilə sərhəd olan Aşağı Bəylərbəyi kəndindən sərhədi keçməyə cəhd göstərməsi barədə məlumat alıb. Saxlanılanların pasportları yoxlanılarkən, onlardan 4-nün azərbaycanlı bir ailənin üzvləri olduqları ortaya çıxıb.Saxlanılanlar deportasiya edilmək üçün rayon polis idarəsinin xaricilərlə iş şöbəsinə təhvil veriliblər. Hazırda onların Azərbaycana göndərilmələri istiqamətində iş aparılır. Azərbaycanın İstanbuldakı baş konsulu Həsən Zeynalov da saxlanılanların azərbaycanlı bir ailənin üzvləri olduğunu BBC-nin Azərbaycan xidmətinə təsdiqləyib. H. Zeynalov deyib ki, Türkiyə polisi konsulluğu bu barədə məlumatlandırıb, lakin saxlanılanların sənədlərilə bağlı problem olmadığı üçün bu işlə konsulluq məşğul olmur. Baş konsul deyib ki, saxlanılan şəxslərlə bağlı gələcək tədbirlər Azərbaycandakı araşdırmalardan sonra bəlli olacaq.