Helikopter Azərbaycanın cəbhənin ön xəttində yerləşən mövqelərinə atəş zərbələri endirmək tapşırığını icra edib  “Noyabrın 12-də Ermənistan Silahlı Qüvvələrinin bölmələrinə atəş dəstəyi verən Mi-24 döyüş helikopteri cütlüyü heyətlərinin uçuşları və yerinə yetirdiyi tapşırıqların təhlili ilkin nəticəni bir daha təsdiq edir”. Lent.az-ın Müdafiə Nazirliyinin saytına istinadən xəbərinə görə, ərazidə aparılan son müşahidələrə əsasən, əməliyyat-kəşfiyyat məlumatları və hərbi aviasiya mütəxəssislərinin rəylərinə istinadən hadisələrin hazırlanmış animasiya modelindən aydın görünür ki, uçuş heyəti helikopterin döyüş təyinatına uyğun olaraq cəbhənin ön xəttində yerləşən mövqelərimizə atəş zərbələri endirmək tapşırığını icra edib.    Qarşıya qoyulan döyüş tapşırığını yerinə yetirdikdən, yəni mövqelərimizə atəş açdıqdan sonra, düşmən helikopterləri döyüş təlimatlarının tələblərinə tam əməl etməklə bir-birini manevrlərlə qoruyaraq atəş zonasını tərk edirdilər.   Erməni tərəfinin hadisə ilə bağlı məlumatları manipulyasiya etməsini, işğal olunmuş ərazilər üzərində bütün aviauçuşlara qadağa qoyulmasını, bu ərazilərdə həyata keçirilən razılaşdırılmamış uçuşların ölkəmizin hava sərhədlərinin pozulması kimi qiymətləndirilməsini nəzərə alaraq bildiririk ki, mövqelərimizə atəş açan düşmən hərbi helikopteri cavab atəşi ilə məhv edilib.

Qardaşı və anasını itirən qız intihar edib    Noyabrın 17-də Bakının Sabunçu rayonunda baş vermiş intihar hadisəsi ilə bağlı bəzi məqamlar üzə çıxıb. Lent.az-ın əldə etdiyi məlumata görə, Məhəmmədi qəsəbəsində 1996-cı il təvəllüdlü Abdulzadə Ləman Süleyman qızı özünü kirayədə yaşadığı evdə asıb. 18 yaşlı qız elektrik naqili ilə ayaqlarını çarpayıya bağlayıb. Daha sonra naqilin bir ucunu qapının əlcəyinə keçirən L.Abdulzadə özünü boğaraq intihar edib.     Bildirilir ki, intihar edən 18 yaşlı qızın anası 3 ay əvvəl dünyasını dəyişib. Bundan əvvəl isə onun qardaşı vəfat edibmiş. Əslən Şəki rayonundan olan L.Abdulzadə atası ilə birlikdə Məhəmmədidəki evdə kirayə yaşayırmış.   Dünən axşam saatlarında evə qayıdan Süleyman Abdulzadə qapının arxadan bağlandığını və qızının telefon zənglərinə cavab vermədiyini görüb. Qapını sındıraraq içəri daxil olan ata qızının intihar etdiyini görüb.   Faktla bağlı cinayət işi açılıb, araşdırmalar aparılır.           *****     12:11       Bakıda intihar hadisəsi baş verib.   Lent.az-ın vesti.az-a istinadən verdiyi məlumata görə, Sabunçu rayonunda 18 yaşlı qız özünü öldürüb. Məhəmmədi kəndində yaşayan Abdulzadə Ləman Süleyman qızı qeyri-adi şəkildə intihar edib. Belə ki, çarpayısını şaquli vəziyyətdə qoyan qız elektrik naqili ilə özünü ayağından asıb. İntiharın səbəbləri hələlik məlum deyil. Hadisə ilə bağlı Sabunçu rayon Prokurorluğu araşdırma aparır.

“Ermənistan Dağlıq Qarabağdakı əlaltıları vasitəsi ilə şou düzəldib. Dilqəm Əsgərov və Şahbaz Quliyevlə bağlı məsələdə məhkəmə zalından başlamış bütün proseslərdə beynəlxalq hüquq normalarının pozuntusu müşahidə olunur”.     APA-nın məlumatına görə, bunu Əsir və itkin düşmüş, girov götürülmüş vətəndaşlarla əlaqədar Dövlət Komissiyasının İşçi Qrupunun rəhbəri Firudin Sadıqov deyib.   F. Sadıqov bildirib ki, girov azərbaycanlıların öz dillərində, başa düşdükləri dildə özlərini müdafiə etmək imkanı yoxdur: “Guya onları tərcüməçi ilə təmin ediblər. Lakin tərcüməçi rus və Azərbaycan dillərini səlis bilmir. Məhkəmə zalında maskalı şəxslər iştirak edir. Bu da təzyiq vasitəsidir. Təqsirləndirilən şəxslər ayrıca oturmalı, tərcüməçiləri, vəkilləri ilə sərbəst şəkildə ünsiyyətdə olmalıdırlar. Ermənilərin özlərinin yaydığı kadrlara baxanda da görünür ki, onların suallara hazırlaşmaq imkanı yoxdur”.