Главная » 2014 » dekabr » 5 » Heydər Əliyevin əsirlikən xilas etdiyi qadın acınacaqlı durumdadır - VİDEO
21:08
Heydər Əliyevin əsirlikən xilas etdiyi qadın acınacaqlı durumdadır - VİDEO
Binəqədi rayonu 6-cı mikrorayonda qaçqınların məskunlaşdığı binanın zirzəmisində yaşayan Leyla Səyyadova və onun həyat yoldaşı Tanrıverdi Səyyadov bu soyuq günlərdə 3 körpə uşaqla birlikdə xarabalıqda yaşayır. Musavat.com-un məlumatına görə, 7 il öncə ailə quran bu insanların həyatı ağrı-acılarla doludur.
Bərdə rayon sakini olan Leyla Səyyadova 1992-ci ildə Xocalı soyqırımı zamanı anası ilə birgə ermənilərə əsir düşüb və 1 il 7 ay əsirlikdə qalıb. O, vaxtilə mərhum prezident Heydər Əliyevin təşəbbüsü ilə əsirlikdən xilas edilib.
Onun həyat yoldaşı 54 yaşlı Tanrıverdi Səyyadov Qarabağ müharibəsi dövründə həbsdə olub, döyüşdə vuruşması üçün azad edilib və 4 il Qarabağ uğrunda vuruşub. Onlar 2007-ci ildə ailə qurublar və 3 övladları var. Böyük övladının 6, digərinin 4, ən kiçiyinin isə 2 yaşı var. Ancaq bu uşaqları rahat böyütmək üçün Səyyadovlar ailəsinin nəinki evi, hətta gündəlik çörək pulu belə, yoxdur.
Əsirlikdə sağlamlığını itirən Leyla əlildir. Ermənilər avtomatın qundağı ilə onun başını zədələyib, indi başının bir hissəsi silikondur. Gözünün biri görmür, digərinin isə görmə faizi 60- faizə düşüb.
Tanrıverdi Səyyadov deyir ki, Qobustan rayonunda evi olsa da, bacısı həmin evi onun əlindən alıb, evə sahib çıxıb. Ailə 17 gün Dram teatrının qarşısındakı parkda gecələyib.
Uşaqlarına nə geyim, nə ərzaq ala bilməyən ailə başçısı isə xəstə olduğundan işləyə bilmir. İndi ailənin həyatı xeyirxah insanlardan asılıdır.
Ailənin həm maddi, həm də tibbi yardıma ehtiyacı var. Leyla Səyyadovanın başındakı silikonun vaxtı bitiyindən onun dəyişilməsi üçün əmliyyata ehtiyacı var. Uşaqlardan birinin isə gözündə problem var və təcili müalicə olunmazsa, o, görmə qabiliyyətini itirə bilər.
İndi Sayadovlar ailəsi dövlətdən sosial yardım və sığınacaq istəyir. Xeyirxah insanlara üz tutan Tanrıverdi Səyyadov bu ağır vəziyyətdən xilas olunacağı günü gözləyir.
Biz də inanırıq ki, xeyirxah insanlarımız bu 3 körpənin gözünü yolda qoymayacaq və ailəni öz yardımları ilə sevindirəcəklər.
Ailənin yaşadığı dəhşətli vəziyyəti aşağıda təqdim etdiyimiz videodan izləyin.
